Siglir tar il cuntegn

Header

audio
Volley Surselva – da nov en 2. liga
Or da Actualitad dals 21.05.2022.
abspielen. Laufzeit 4 minutas 42 Sekunden.
cuntegn

Ballarait Volley Surselva enavos en la 2. liga

Suenter dus onns turna il club da ballarait «Volley Surselva», ch’è da chasa a Glion, puspè enavos en la segunda liga regiunala. Ils Sursilvans han gudagnà 11 da 12 gieus durant la stagiun passada ed uschia dominà il campiunadi da terza liga.

Nus avain blera experientscha cun perder gieus en la 2. liga. Capita quai er la proxima stagiun n’ha quai nagina influenza sin nossa bun’atmosfera entaifer l’equipa.
Autur: Roman Cantieni president Volley Surselva

Igl è stà ina stagiun quasi perfetga per ils umens dal Volley Surselva. Sulet encunter il segund da la tabella, il VBC Walenstadt, hai dà il schaner ina terrada. Suenter avair terminà il campiunadi sin l’emprim plaz ha l’equipa decidì da turnar enavos en ina liga pli auta.

Duas equipas dad umens

Da nov trametta Volley Surselva duas equipas dad umens en il campiunadi. Dasper l’equipa da segunda liga han ils Sursilvans a partir da la stagiun 2022/23 er in’equipa en la terza liga. Là duain oravant tut ils giuvens survegnir la schanza d’astgar dar campiunadi per uschia rimnar experientscha. Plinavant ha Volley Surselva anc in’equipa da dunnas che dat en la quarta liga.

Mecca da juniors

Malgrà ch’il ballarait è, gist en Surselva, in sport a l’ur dumbra l’uniun 40 fin 50 giuvenils. Volley Surselva, la gronda uniun da ballarait en il Grischun suenter il VBC Cuira, è uschia in Mecca da juniors. Ed adina puspè po il club er trametter en la Bassa, principal a Jona, in u l’auter talent da ballarait. La filosofia dal club saja dà dar als talents questa pussaivladad, di Roman Cantieni. I na fetschia nagin senn da tegnair ils talents a Glion per giugar be ina segunda liga sche quels hajan la schanza da giugar ina liga pli auta.

Il problem n’è il mument betg da chattar giuvenils che dattan ballarait, mabain trenaders, gliez vegn adina pli e pli grev.
Autur: Roman Cantieni president Volley Surselva

Il proxim temp èn ils umens da Volley Surselva da chattar sin las plazzas da beachvolley a Glion. A partir da l’avust vegn lura puspè trenà en halla, gugent almain duas giadas ad emna, per uschia esser pront sin il campiunadi che cumenza mez october.

Actualitad

Artitgels legids il pli savens

Scrollar a sanestra Scrollar a dretga