Siglir tar il cuntegn

Header

cuntegn

Ballape regiunal US Schluein Glion enavos en la 2. liga

Suenter duas stagiuns en la terza liga gioga la US Schluein Glion la proxima stagiun 2019/2020 puspè en la segunda liga da ballape.

Che l'US Schluein Glion dumogna la promoziun en la segunda liga ha ella era d'engraziar als da Domat. En l'ultim gieu dal campiunadi batta Domat il capo-gruppa d'enfin qua, Bogn Ragaz cun 4:2. Cunquai che Bogn Ragaz fa uschia nagins puncts ed ils da Schluein Glion han gudagnà lur davos gieu a chasa encunter Valposchiavo Calcio cun 3:0, gudognan ils Sursilvans il campiunadi da terza liga cun in avantatg da 2 puncts sin Bogn Ragaz.

audio
Mezdi: US Schluein Glion puspè en 2. liga
ord Actualitad dals 17.06.2019.
laschar ir. Durada: 3 minutas 19 Secundas.

Um dal gieu, ch'ha fatg dus gols per Schluein Glion, è stà Lars Caduff. L'attatgader da l'US Schluein Glion ha sajettà durant l'entira stagiun 20 gols per ils Sursilvans ed è uschia er stà il meglier tiragols da l'entira terza liga.

Enavos en la segunda liga

La speranza mora l'ultim, quai è stà la devisa dals ballapedists da Schluein Glion. Avant bun in'emna han els battì ordaifer il leader Bogn Ragaz cun 2:0 e uschia mess pulit sut squitsch il club da Son Gagl en vista a la fin dal campiunadi. Ils da Bogn Ragaz èn stgarpitschads era en l'ultim gieu e ston uschia era giugar la stagiun che vegn en terza liga.

Ils da Schluein Glion ch'han adina gì mess la finamira da puspè vulair turnar sco meglra equipa sursilvana en la segunda liga han reussì, na l'ultim grazia a l'agid dals ballapedists da Domat. Suenter duas stagiuns en la terza liga è la promoziun en la segunda liga realitad.

RR sportissimo 17:00

Artitgels legids il pli savens