Ils Lusitanos de Samedan turnan puspè en la quarta liga da ballape. L’equipa da l’Engiadin'Ota che sa cumpona da giugaders cun ragischs portugaisas gudogna il campiunadi e fa puspè il pass amunt. Gia ina partida avant la fin dal campiunadi en tschintgavla liga è cler. Il Lusitanos han realisà la promoziun.
Leader durant quasi l’entira stagiun
Fin qua han ils Lusitanos de Samedan pers mo l’emprima partida dal campiunadi en tschintgavla liga. Dapi lura va l’equipa dad ina victoria a l’autra. Gia suenter la runda d’atun eran ils Lusitanos a la testa da la tabella, e quella plazza n'ha l’equipa mai pli dà or da maun. Suenter l’emprima mesadad dal campiunadi è naschì tar l’equipa la finamira dad empruvar da turnar puspè en quarta liga. Suenter duas stagiuns ina liga pli bass è quai uss reussi.
Ivetta a la fin dal campiunadi
La davosa partida da campiunadi en tschintgavla liga dat il FC Lusitanos de Samedan encunter Tavau, ch'è actualmain sin plazza dus da la tabella. A la fin dad ina lunga stagiun vegni uschia anc al duel da las duas meglras equipas da l’entira stagiun. Durant quella partida vulan ils trenaders dals Lusitanos era dar ina schanza a quels giugaders che n'han betg savì dar durant l’entira stagiun. Cler è dentant era che l’equipa vul gudagnar era questa ultima partida dal campiunadi e festivar lura cun tut ils fans la promoziun ina liga pli aut.
RR Sportissimo 18:00