Dapi passa 50 onns s’entaupa la giuventetgna ina giada l’onn sin la plazza da ballape «Cul» a Zernez per curunar las meglras equipas da la regiun. Passa 30 equipas da l’Engiadina, da Samignun e da la Val Müstair fan part al turnier d’uffants a Zernez. Uffants e giuvens da sis fin quindesch onns cumbattan per gols e sa chapescha er per medaglias e per buccals.
Turnier cun la pli gronda tradiziun
Dapi la fundaziun dal club da ballape da Zernez l’onn 1968 datti il turnier d’uffants. Il turnier è creschi durant ils davos tschintg decennis al pli grond turnier da quest gener en la regiun. E quai malgrà ch'il CB Zernez na dispona betg dad ina emprima equipa che dat in campiunadi. La finamira è sa chapescha er dad avair ina giada avunda giugaders per ina emprima equipa. Actualmain treneschan 70 uffants en las differentas categorias da vegliadetgna tar il CB Zernez. Forsa sa datti ch'ina ventgina resta fidaivla al sport da ballape e ch'il CB Zernez po uschia furmar ina emprima equipa che dat campiunadi.
Zernez l’emprim da quatter gronds turniers
Il turnier da ballape d’uffants a Zernez stat al cumenzament dad ina seria da quatter turniers che vegnan dads en l’Engiadina, en Samignun, ed en Val Müstair. Ils uffants han uschia era la schanza da far revantscha. Suenter il turnier da Zernez spetga per exempel era il turnier d’uffants a Müstair u lura er il turnier a Scuol.
RR actualitad 08:00