Siglir tar il cuntegn

Header

audio
Schluein Glion vegn relegà en 3. liga
Or da Sport ed actualitad dals 05.06.2022.
laschar ir. Durada: 4 minutas 34 Secundas.
cuntegn

Ballape regiunal US Schluein Glion croda en terza liga

Nagin «happy end» per l'Uniun sportiva Schluein Glion. Ils Sursilvans n'èn betg mitschads da la relegaziun e ston puspè bandunar la 2. liga regiunala. Ina runda avant la fin dal campiunadi resta l'USSI a la cua da la tabella en 2. liga cun in dischavantatg da quatter puncts sin il stritg.

Regalà sco finiziun ina victoria als fans da chasa

Il davos gieu da chasa en la 2. liga regiunala ha l'US Schluein Glion però gudagnà. Ils Sursilvans han battì la sonda saira l'equipa da Montlingen, il segund davos da la tabella, cun 4:2. Il gieu ha gia cumenzà optimal per ils Sursilvans. En la 2. minuta ha Marino Cavegn sajettà cun il chau il 1:0 suenter in corner. Suenter pausa ha l'USSI sajettà trais ulteriurs gols. Il 2:0 ha fatg Sattar Afzali en la 54avla minuta, il 3:0 Gianluca Casutt en la 67avla minuta ed il 4:0 Murat Leblebici en la 85avla minuta. En las davosas minutas è l'adversari dal chantun Son Gagl anc vegnì da scursanir al 1:4 respectiv al 2:4.

Buna runda da primavaira n'ha betg gidà

Damai ch'ils concurrents directs St. Margrethen ed Au-Berneck han er gudagnà puncts en questa segunda davosa runda da campiunadi na vegnan ils da Schluein Glion betg pli da far il pass sur il stritg, er betg cun ina victoria en il davos gieu da campiunadi la proxima fin d'emna ordaifer encunter Au-Berneck. La raschun daco che l'USSI sto puspè returnar en ina liga pli bassa è la runda d'atun. En quella han ils Sursilvans gudagnà be 5 puncts. Quest deficit n'è Schluein Glion betg pli vegnir da curreger questa primavaira. Ma l'equipa da Corsin Cavegn ha fatg in svilup ils davos mais e mussà per part in fitg bun ballape cun questa equipa giuvna. La finamira è e sto uss esser da tant pli spert puspè turnar enavos en la 2. liga.

In sugus datti dentant per ils fans da ballape en Surselva la proxima stagiun. Lura spetga puspè sin l'US Schluein Glion in derbi sursilvan, quai encunter il CB Trun/Rabius.

2. liga interregiunala:

En la segunda liga interregiunala ha Cuira gudagnà cunter il FC Blue Stars da Turitg cun 3:1 .

RTR novitads 20:00

Artitgels legids il pli savens

Scrollar a sanestra Scrollar a dretga