Gia dapi intgins onns va il club da ballape da Laax stedi si en quarta liga e croda puspè enavos en tschintgavla liga. Capità er questa stagiun. Quella relegaziun è dentant stada accumpagnada da pulita dissonanza entaifer l'equipa, abstrahà da la magra bilantscha dad 8 puncts ord 18 partidas. Era sch'i ha dà gist en ils emprims gieus da la stagiun puncts èsi ì da mal en mender per ils da Laax. Curt avant la runda da primavaira strusch insatgi che vuleva cuntinuar.
Trenaders han pretendì memia bler
Cura ch'il CB Laax è promovì l'onn passà en quarta liga era la persvasiun gronda da quella giada restar e sa tegnair amez la tabella. Ed intgins vulevan anc dapli, raquinta Nathan Gartmann, ch'ha manà l'equipa sco trenader ad interim tras la runda da primavaira. Las ambiziuns dals trenaders èn stadas memia grondas ed els han pretendì memia bler dals giugaders. Ils trenaders èn sa concentrads surtut sin ils giugaders da tschep ed han tralaschà tut tschels. Ina filosofia ch'ha prendì scadina motivaziun ed ha era laschà bandunar in u l'auter il club.
Laschar turnar il plaschair
Retrair il CB Laax dal campiunadi en quarta liga fissi stà fatal e forsa perfin la fin per in pli lung temp da l'emprima equipa dal club, manegia Nathan Gartmann. El che dat dapi ch'el po sa regurdar ballape tar ils da Laax e ch'è dapi l'atun blessà, ha persvas ils giugaders da cuntinuar. Sch'el na possia betg gidar il club sin il plaz lura dasperas ed ha surpiglià il post da trenader durant ils gieus da primavaira. Era sche la relegaziun en tschintgavla liga n'è betg stada d'evitar, il principal saja ch'il plaschair saja turnà, sin e sper la plazza da ballape. Ambiziunà, gea, ma tut cun mesira.