En la 2. liga regiunala ha il club da ballape da Domat pudì dar ses emprim gieu a chasa. Ed ils Grischuns han gudagnà cunter Abtwil-Engelburg cun 3:0.
Per l'US Schluein Glion ha la nova stagiun cumenzà cun in 2:2 cunter l'FC Herisau. Gia baud han ils Sursilvans survegnì l'emprim gol (8.), dentant en la 23avla minuta ha Aron Büchler pudì egualisar per l'USSI al 1:1. Quai è era stà il resultat da pausa. Cun il gol da Rui Filipe Gomes Machado è Schluein Glion lura perfin ì en avantatg en la 55avla minuta. A Herisau èsi dentant anc gartegià d'egualisar paucas minutas avant la fin (80.).
Duas terradas per ils clubs rumantschs en 3. liga
Sia emprima stagiun en la 3. liga ha il CB Surses cumenzà cun ina terrada 1:4 cunter il FC Sargans. Suenter 45 minutas eran ils da Surses cun 0:1 enavos. Sin il segund gol da Sargans en la 52avla minuta hai anc dà ina reacziun dals indigens, Nico Demarmels ha scursanì al 1:2. Ils dus ulteriurs gols da Sargans al 1:4 èn lura pir crudads el temp supplementar (91avla e 93avla minuta).
Trun/Rabius ha dà ordaifer cunter Valposchiavo Calcio, e medemamain betg pudì evitar ina sconfitta. En il derby grischun han ils Sursilvans pers cunter ils Puschlavins cun 0:2. Suenter l'emprima mesadad era il gieu anc pari 0:0, lura ha Nicolo Pola sajettà en avantatg Poschiavo. Il segund gol al resultat final ha marcà Mattia Cathieni en la 84avla minuta.
