Puncto atletica leva saja il Grischun «in chantun da svilup». Peter Philipp, il president da l'Uniun d'atletica leva da Cuira, ch'è sez stà currider olimpic, di pulit direct nua ch'il Grischun stat en sports da currer, siglir lung, siglir aut e bittar l'asta. En sasez fissan quai sports che na custian betg bler temp da pratitgar. Cumpareglià cun auters sports, na stoppian ins er betg gia sco uffant esser en in cader regiunal u interregiunal per insumma avair la schanza da pudair vegnir vinavant.
«Blers talents zuppads»
Peter Philipp fa l'exempel cun il sprinter William Reais. Pir cun 16 onns è el vegnì tar il BTV Cuira. Uss ha el en paucs dis sia premiera olimpica. Il president da l'uniun d'atletica leva da Cuira craja ch'i dat en Grischun blers talents d'atletica leva, talents zuppads. Cunquai ch’auters sports sco skis, passlung, mountainbike, hockey u unihoc domineschan, giajan uffants cun affinitads per l'atletica leva «a perder». Per promover quellas e quels dovria ora en las regiuns manaders da giuventetgna e sport cun in'affinitad per l'atletica leva. Quai saja dentant difficil.
Er schon il BTV Cuira haja difficultads da chattar avunda manaders che sa scoleschian sin quel sectur. Landquart, Cuira e Tusaun èn ils lieus nua che l'atletica leva vegn promovida activ en il Grischun.
Infrastructura sco sfida
In problem è pia co laschar chattar ils uffants la via tar l'atletica leva. In auter l'entira infrastructura. Qua datti dentant moviment. Cun la sanaziun da l'entir areal a Landquart-Ried. Quel fa gia dapi ditg part al catalog d'indrizs da sport dal Grischun da muntada, regiunala, chantunala e naziunala. Per modernisar tut ils indrizs e surtut adattar els als standards naziunals che lubeschan uschia er events pli gronds, vegn impundì passa 6 milliuns francs. Qua pudessi dar in stausch a l'entir moviment d'atletica leva en il Grischun.
Era «l'UBS Kids Cup» cun las disciplinas sprint, siglir e bittar porta fritgs. Surtut en il sprint, cun u senza obstachels, è la Svizra dapi intgins onns sin buna via. Per il rest da las disciplinas d'atletica leva na datti betg quella pussaivladad. Uschia ch'i na fa era betg surstar che Peter Philipp, che ha avant 18 onns terminà sia carriera da currer, tegn anc adina il record svizzer sur 1'500 meters en halla.