Grazia a las bunas prestaziuns da questa stagiun fiss Arina Riatsch stada qualifitgada per il campiunadi d’Europa da skis da tura en l’Italia. Spert era dentant cler ch'era questa occurrenza gronda croda pervia dal coronavirus en l’aua. La regiun enturn Madonna di Campiglio, il lieu dal proxim campiunadi d’Europa, è en l'Italia dal nord, ed uschia en ina regiun pertutgada fitg ferm dal virus.
Emprima stagiun tar l’elita
La stagiun vargada ha Arina Riatsch suttamess tut al sport da skis da tura. Ella ha vivì sia emprima stagiun sco «profi» en il cader U23. Quest enviern è ella vegnida promovida. Ella ha savì sa participar a cursas da la cuppa mundiala da skis da tura tar l’elita. Ultra da quai ha ella era adina lavurà tranteren sco tgirunza. Arina Riatsch è era stada a scola. Per avair in tal pensum è la stagiun, ch'era fitg curta, dentant gartegiada bain. Quasi meglier che la stagiun vargada, nua che la giuvna da bainbaud 24 onns aveva mess tut sin la carta skis da tura.
Ponderaziuns davart il futur
Suenter che la stagiun è stada terminada è Arina Riatsch sa focussada sin la scolaziun sco tgirunza. L'entschatta da matg è a fin il davos bloc d’instrucziun. Alura segua anc il praticum en il Center da sanadad Engiadina Bassa a Scuol. Il settember avess la scolaziun alura dad esser terminada e l’atleta da skis da tura esser tgirunza da malsauns cun diplom federal. Co ì va alura vinavant il proxim enviern n'è anc betg cler. Segir è mo ch'ella vul maridar questa stad, sa chasar cun ses um en Engiadin'Ota, ed alura mirar enavant.