Siglir tar il cuntegn

Regiunal 25 onns cursa da mountainbike dal Mittenberg

La cursa da mountainbike dal Mittenberg festivescha quest onn il giubileum da 25 onns. La cursa tradiziunala da 5 kilometers cun 450 meters differenza d’autezza sin il culm-chasa da Cuira è dapi il 1990 in ver success.

Maletg simbolic: La cursa da mountainbike sin il Mittenberg datti dapi il 1990.
Legenda: Maletg simbolic: La cursa da mountainbike sin il Mittenberg datti dapi il 1990. Keystone

Il 1990 ha la cursa dal Mittenberg gì premiera. Iniziant è stà il ESV, Eisenbahner Sportverein da Cuira, cun il president Fidel Bass. Tar la premiera èn 78 ciclists stads a la partenza.

Dapi il 1991 è adina vegnì manà atras questa cursa duas giadas ad onn, ina gia la primavaira, ina gia l’atun. Il 1995 èn stads a la partenza 219 participants, enfin oz il record. Ma er ils davos onns carmala la cursa populara adina puspè enturn 150 persunas a la partenza. Dapi 10 onns èsi era pussibel da concurrenza en currer.

Il record cun il mountainbike davent da la stalla dal Waldhaus sin il Mittenberg è oz tar bun 17 minutas, en currer tar bun 22 minutas.