La pli populara cursa da mountainbike da l’entira Svizra ha gì ses battaisem l’onn 2002. Da quella giada avevan in per amis da quest sport ensemen cun la regiun turistica e las pendicularas da Motta Naluns dà il tun da partenza per il Bike-Maraton dal Parc Naziunala. Tar l’emprima ediziun anc nagin che ha pudì s’imaginar che la cursa vegniss ad avair in tal success. 20 onns suenter l’emprima ediziun è la cursa QUEL eveniment da sport da la stad en Engiadina Bassa e Val Müstair.
Ina clav per il success: la cursa roiala enturn il Parc Naziunal
141 kilometers, radund 4'000 meters differenza d’autezza cun il tetg da la cursa, il pass da Chaschauna che collia l’Italia cun l’Engiadina'Ota, quai èn las datas da questa cursa. Partenza è a Scuol la damaun las 07:15. Ils pli sperts vegnan spetgads puspè vers las 12:45 enavos a Scuol.
Limita da participants pervi da corona
Gia baud han ils organisaturs decidì da limitar il dumber da participantas e participants da l’ediziun da giubileum sin 1’500 persunas. Uschia han ins gì davent dal principi ina segirezza da planisaziun. Sa chapescha che la cursa, che ha era gia gì varga 2'000 participantas e participants, è exausta. Tut las plazzas da partenza èn davent.