Siglir tar il cuntegn

Header

audio
Double Bubble per ils hockeyans durant ils playoffs
Or da Actualitad dals 13.04.2021.
laschar ir. Durada: 02:28 minutas.
cuntegn

Playoffs da hockey Temp intensiv en ina «double bubble»

Per ils fans da hockey cumenza il pli bel temp da l’onn – ils playoffs. Quest onn puspè senza il HCD ch’ha pers la seria da pre-playoff encunter il SC Berna e sto uschia persequitar la fasa decisiva dal campiunadi a la televisiun.

Per vegnir a fin cun ils playoffs fin mez matg sto vegnir giugà mintga dus dis. Quai pretenda bler da las otg equipas che cumbattan anc per il titel da campiun svizzer. I spetga in temp fitg intensiv, corporal e mental. Perquai è er il temp tranter ils gieus, il temp da regeneraziun immens impurtant.

Natiralmain spetga in dir temp sin ils hockeyans, ma ils playoffs n'èn betg in camp da wellness.
Autur: Walter Kistler medi da sport

Sin il pli tard ils 14 da matg sto il campiunadi esser decidì per che la naziunala svizra da hockey haja anc avunda temp da sa preparar sin il campiunadi mundial che cumenza be in’emna pli tard a Riga en la Lettonia.

audio
Sfida corporala e mentala durant ils playoffs
02:39 min, Actualitad dals 13.04.2021.
laschar ir. Durada: 02:39 minutas.

Sport-Bubble + Home-Bubble

Per er mitschar tras quests playoffs senza pli gronds incaps da corona prevesa il concept da segirtad ina uschè numnada «double bubble». Vul dir; giugaders e tut ils responsabels dastgan durant quai temp sa mover sulet en las hallas da glatsch ed en lur dachasa. Uschia duain ils contacts vegnir limitads. Per exempel ir a far cumissiuns u duvrar il traffic public n’è betg lubì durant questa fasa decisiva.

Bunas cartas per l'EV Zug

Avessan ils playoffs da vegnir interruts pervia da corona fiss il victur da la qualificaziun il nov campiun svizzer, quai era gia vegnì decidì ad ina radunanza da la liga il schaner. En quest cas fiss quai l’EV Zug, nun che l’equipa da la Svizra centrala fiss gia crudà ora dals playoffs.

Ils playoffs da quartfinal vegnan decidì en ina seria da best-of-seven. A partir dals mezfinals decidan ils clubs co vinavant. La finamira è dentant er da giugar il final almain sur ina seria da best-of-five.

Duels da playoffs quartfinal:

  • EV Zug (1.) – SC Berna (9.)
  • HC Lugano (2.) – Rapperswil-Jona Lakers (10.)
  • Friburg-Gottéron (3.) – Genevra-Servette (6.)
  • Losanna (4.) – ZSC Lions (5.)

RTR actualitad 12:00

Artitgels legids il pli savens

Scrollar a sanestra Scrollar a dretga