Gia tschintg giadas ha la Val Müstair organisà cursas dal Tour de ski. La seria da cursas ch'i dat dapi passa quindesch onns è vegnida organisada avant diesch onns per l’emprima giada en Val Müstair. Dapi lura ha la regiun ramassà bleras experientschas sin quest livel, e vuless era en il futur esser part da la cuppa mundiala da passlung. Per il proxim enviern han ins puspè pudì suttascriver il contract cun la FIS. Ed era suenter para quai da vesair ora bain per restar en il chalender.
Cursas alternant cun Lai
L’emprima cursa da la seria da cursas dal Tour de ski ha la Val Müstair organisà l’onn 2013. Dapi lura ha quai dà alternant cun la regiun da Lai cursas da questa seria. Gia tschintg giadas è l’elita dal mund da passlung stada per cursas dal Tour de ski en Val Müstair. Uss han ins dentant stuì tractar nov il contract cun la Federaziun Internaziunala da skis.
Per il mument dat quai mo contracts dad in onn. Dentant datti plans per il futur, nua che la Val Müstair è er da la partida.
Actualmain vegn contractà cun ils purs
Davart da la FIS pon ils organisaturs da las cursas dal Tour de ski en Val Müstair cumenzar cun l’organisaziun. Actualmain vegn gest tractà cun ils proprietaris dal terren pervia da la pussaivladad, nua far las loipas per las cursas. Bainprest cumenz’ins alura cun la organisaziun dal rest. Suenter tschintg ediziuns e diesch onns experientscha pudess quai quasi gia esser rutina. Las cursas en Val Müstair èn alura ils 31 da december ed il prim da schaner 2023.