Siglir tar il cuntegn

Header

cuntegn

Onuraziun da la Norvegia Dario Cologna survegn la medaglia dal Holmenkollen

La medaglia che vegn surdada gia dapi l'onn 1895 è la pli auta distincziun dal sport da skis norvegiais. Dasper Dario Cologna èn er vegnids onurads cun la medaglia Maren Lundby, Johannes Rydzek e Johannes Thingnes Boe.

Dario Cologna haja contribuì bler a la popularitad dal sport da passlung, surtut en l'Europa Centrala. Cun sia persunalitad e ses demenar haja el avrì ils egls a blera glieud per il passlung – quai sco sport activ ed er sco sport a la televisiun. Cologna mussia che cun perseveranza e ferma voluntad saja pussaivel da rivar tranter ils topatlets, er sch'ins vegnia d'ina naziun betg exnum da passlung. Uschia argumentescha l'uniun norvegiaisa da skis nordic, Skiforeningen, sin sia pagina d'internet l'onuraziun da Dario Cologna .

Onurà trais ulteriurs atlets

Dasper il passlunghist da la Val Müstair, Dario Cologna, èn trais ulterius atlets vegnids onurads cun la medaglia dal Holmenkollen: Uschia la siglidra da skis norvegiaisa Maren Lundby, il combinatur nordic da la Germania Johannes Rydzek ed il biatlet norvegiais Johannes Thingnes Boe.

La medaglia dal Holmekollen vegn surdada da l'uniun norvegiaisa da skis nordic, Skiforeningen, gia dapi l'onn 1895. I sa tracta da la pli auta distincziun dal sport da skis norvegiais. Onurads vegnan uschia mintga onn sportists da skis activs per lur prestaziuns extraordinarias, surtut er en las cursas tradiziunalas dal Holmenkollen ad Oslo.

Medaglia dal Holmenkollen.
Legenda: Skiforeningen.no

Artitgels legids il pli savens