Siglir tar il cuntegn

Naziunal/Internaziunal Wendy Holdener segunda a Lienz

La skiunza svizra Wendy Holdener ha manchentà be per pauc sia emprima victoria en la cuppa mundiala. Al slalom da Lienz è Holdener vegnida segunda cun in retard da sulet 7 tschientavels sin la victura svedaisa Frida Hansdotter.

Las trais dunnas che stattan sin il podest a Lienz.
Legenda: Wendy Holdener manchenta sulet per 7 tschientavels sia emprima victoria en ina cursa da la cuppa mundiala. Keystone

Cumplettà il podest sco terza ha la Slovaca Petra Vlhova. Er Michelle Gisin cuntanscha in plaz tranter las meglras 10. Gisin è vegnida 7avla.

Wendy Holdener, il grond trumf svizzer, era gia segunda suenter l’emprim percurs. Holdener aveva in retard da be 11 tschientavels sin la futura victura la Svedaisa Frida Hansdotter. Terza suenter l’emprim percurs cun in retard da 39 tschientavels era l’Austriaca Michaela Kirchgasser. Kirchgasser è crudada ora en il segund percurs. Uschia che Petra Vlhova da la Slovachia vegn cun in retard da 43 tschientavels terza.

Gisin sin plazza 7

Michelle Gisin era suenter l’emprim percurs gia 7avla ed è era vegnida da tegnair questa plazza en il segund percurs. Ella vegn 7avla cun in retard dad 1,12 secundas. Quai è il meglier resultat per Gisin en la cuppa mundiala.

Denise Feierabend ch’era sa qualifitgada per il segund percurs sco 21avla vegn la finala 25avla cun in retard da passa 4 secundas. Charlotte Chable è crudada ora gia en l’emprim percurs.

RR novitads 15:00