Siglir tar il cuntegn
cuntegn

Naziunal/Internaziunal Wawrinka participescha a l'Australian Open

Dus dis avant il cumenzament da l'Australian Open ha Stan Wawrinka confermà ch'el prendia part a l'emprim turnier da Grand Slam da l'onn nov. Per Wawrinka èsi ses emprim turnier suenter ina pausa da blessura dad in mez onn.

Stan Wawrinka.
Legenda: Wawrinka participescha a l'Austalian Open. Keystone

Ils ultims dis hai adina puspè dà dubis, sch'il giugader svizzer da tennis possia participar a l'Australian Open. Pliras giadas ha el stuì spustar ses return. Uss ha il victur da l'onn 2014 annunzià, ch'el saja pront per l'emprima runda dal turnier da Grand Slam. En l'emprim gieu frunta Wawrinka sin Ricardas Berankis da la Lituania.

El sa sentia meglier. Er sch'el n'haja anc betg il livel corporal ch'el giavischia, saja el tuttina persvas, ch'el possia gudagnar gieus a l'emprim turnier da Grand Slam da l'onn nov. L'ultim mez onn è stà difficil per il giugader da 32 onns. Pervi d'ina blessura dal schanugl, n'ha el betg pudì prender part a turniers. Ultra da quai è ses trenader da success Magnus Norman sa separà dad el.

RR novitads 12:00