Siglir tar il cuntegn
cuntegn

Naziunal/Internaziunal Von Siebenthal 8avla al Tour de Ski – emprima Svizra en top 10

Nathalie von Siebenthal cuntanscha a la 11avla ediziun dal Tour de Ski l’otgavel plaz. Quai è il meglier resultat ch’ina Svizra ha fin uss fatg al Tour de Ski. Gudagnà la concurrenza ha la Norvegiaisa Heidi Weng.

Nathalie von Siebenthal.
Legenda: Po sa legrar da ses fetg bu resultat. La passlunghista dal chantun da Berna Nathalie von Siebenthal. Keystone

La Bernaisa Nathalie von Siebenthal bain anc pers in plaz en l’ultim’etappa da 9 kilometers en stil liber vers l’Alpe Cermis. Tuttina ha ella cun l’otgavel rang pudì realisar il meglier resultat d’ina Svizra al Tour de Ski.

Cun ses plaz 8 en il classament general ha ella battì il record d’ina passlunghista svizra, fatg avant nov onns da Seraina Mischol, per quatter plazs. La basa aveva la giuvna da 23 onns mess ils dis avant ad Obersdorf, Toblach e Lago di Tesero cun ils plazs 11, duas giadas 7 e 10.

Da sia premiera al Tour de Ski avant dus onns aveva Von Siebenthal terminà la concurrenza sco 17avla, avant in onn sco 15avla. Ses grond potenzial aveva ella gia laschà sentir lezza giada.

Heidi Weng sa legra vesiblamain da ses triumf.
Legenda: Ina victura sco s'auda: Heidi Weng sa legra vesiblamain da ses triumf. Keystone

Heidi Weng ha per l’emprima giada gudagnà il Tour de Ski. La Norvegiaisa da 25 onns ha declassà tuttas concurrentas e ha uschia segirà la victoria a moda suverana.

Il podest dal tur da quest onn cumpletteschan la Finlandaisa Krista Pärmäkoski e la Svedaisa Stina Nilsson.

RR novitads 14:00