Siglir tar il cuntegn

Header

Navigaziun

La giugadra da tennnis svizra Stefanie Vögele.
Legenda: Premiera per Vögele: Per l'emprima giada è ella stada pli ferma che sia contrahenta Nara. Keystone
cuntegn

Naziunal/Internaziunal Vögele top – Golubic flop

Viktorija Golubic n’è betg vegnida sur l’emprima runda or als Australian Open. La Svizra perda cunter la Tscheca Kristyna Pliskova en trais sets cun 3:6, 6:2 e 4:6. Tut auter il resultat da Stefanie Vögele: La giuvna da 26 onns gudogna cunter Kurumi Nara dal Giapun ed è uschia ina runda vinavant.

Stefanie Vögele (WTA 112) ha cuntanschì la segunda runda da l’Australian Open. Ella gudogna cunter la Giapunaisa Kurumi Nara en trais sets cun 2:6, 6:2 e 6:3. Vögele cuntanscha per l'emprima giada dapi dus onns puspè la segunda runda d'in turnier da Grand Slam.

Avant n'aveva la giuvna dal chantun Argovia en quatter gieus anc mai gudagnà ina partida cunter Nara. En l'emprim set na guardava quai anc betg or suenter ina victoria. A partir dal segund set ha Vögele lura giugà pli agressiv ed è sa deliberada dal dictat da la Giapunaisa. Cunzunt il servis è gartegià a Vögele meglier che a sia contrahenta.

En la segunda runda a Melbourne frunta Vögele sin Venus Williams ch'è 10 onns pli veglia.

La giugadra da tennis svizra Viktorija Golubic.
Legenda: I n'ha betg duì esser. Viktorija Golubic avess dentant pudì gudagnar cunter Pliskova. Lezza n'ha betg giugà a moda suverana. Keystone

Flaivla prestaziun da Golubic

Viktorija Golubic (WTA 62) vegn probabel anc in mument a sa grittentar da sia terrada. La Turitgaisa ha cumplettamain manchentà il start da la partida ed era uschia svelt en dischavantatg cun 3:6, 0:2.

En questa stagiun n’ha Golubic anc gudagnà nagin gieu. Quai era lura er da sentir vid la confidenza en sasez che mancava. Tuttina fiss ina victoria cunter Pliskova stada pussibla. Lezza ha numnadamain giugà tut auter che persvadent.

RR novitads 06:00 / 07:30