Siglir tar il cuntegn
cuntegn

Naziunal/Internaziunal Vögele na reussescha betg cunter Venus Williams

Per Stefanie Vögele èn ils Australian Open ids a fin en la segunda runda. Ella perda cunter Venus Williams (USA) malgrà ina plaschaivla prestaziun cun 3:6 e 2:6.

La giugadra da tennis svizra Stefanie Vögele.
Legenda: Era per ina giada en il center. Stefanie Vögele. SRF

Bunamain otg onns suenter ses duel a Wimbledon cunter Venus Williams (WTA 17) ha Stefanie Vögele (WTA 112) dastgà cumbatter cunter la medema contrahenta – e quai sin tribuna gronda.

Ch’ella n’è betg disada arenas uschè grondas è sa mussà gist a l’entschatta: Vögele ha cumenzà gnervusa ed era sveltamain en dischavantatg cun in break dubel.

Problems tar segund service

Suenter ha la giuvna da 26 onns fitgà pe. Grazia a ferms emprims services ha ella cuntanschì 3:4. Il segund service n’ha dentant betg funcziunà tenor giavisch, Vögele ha fatg totalmain tschintg sbagls da dubel. Perquai ha ella lura er stuì dar giu il set cun 3:6 suenter in ulteriur break.

Venus Williams (36 onns) ha la finala gudagnà suenter 83 minutas.

Bainbaud puspè tranter top 100?

Tuttina dastga la prestaziun da Vögele a Melbourne vegnir valitada sco success. Per l’emprima giada dapi passa in onn ha ella sin stgalim da WTA puspè gudagnà quatter gieus en seria. Uschia s’avischina ella puspè a las meglras 100 dal mund.

RR novitads 06:00