Siglir tar il cuntegn
cuntegn

Naziunal/Internaziunal Vital Albin persvada a Cairns

Il mountainbiker da Tersnaus Vital Albin è daventà 16avel en la cursa dals U23 als campiunadis mundials da mountainbike a Cairns en l'Australia.

vital albin sin mountainbike
Legenda: Vital Albin en acziun: Qua cun defender il titel da campiun svizzer (2014). mad

Vital Albin è partì quest onn per l'emprima giada en questa categoria, ed è uschia stà il meglier da tut ils participants sut 20 onns. Sin il victur, Samuel Gaze da la Nova Zelanda, ha il giuven Sursilvan pers 3:37 minutas. Meglier Svizzer tar ils U23 è daventà il Tessinais Filippo Colombo sco 7avel.

Campiunadis mundials la fin d'emna

Sonda marvegl a las 6:30 uras temp svizzer è la cursa d'elita dals campiunadis mundials cun il grond favurit Nino Schurter ch'ha gudagnà en questa stagiun tut las 6 cursas da la cuppa mundiala ed uschia scrit istorgia da mountainbike. Schurter è gia stà 5 giadas campiun mundial e parta damaun er sco defensur dal titel. Plinavant ha il campiun olimpic da Rio manà avant paucs dis la staffetta svizra al titel da campiun mundial a Cairns. Anc avant partan las dunnas cun il trumf svizzer Jolanda Neff ch'ha gudagnà la davosa cursa da la cuppa mundiala en la Val di Sole.

RR novitads 10:00