Siglir tar il cuntegn

Header

cuntegn

Naziunal/Internaziunal Vital Albin gudogna argient a Huskvarna

Al campiunadi d’Europa da mountainbike a Huskvarna en Svezia ha Vital Albin da Tersnaus pudì festivar in ulteriur success. Albin è vegnì segund en la cursa da cross country dals U19 ed ha uschia gudagnà argient.

audio
Mountainbike: Vital Albin è vicecampiun d'Europa dals U19
ord Sportissimo dals 07.05.2016.
laschar ir. Durada: 6 minutas 57 Secundas.

Pli spert che Vital Albin è sulet Thomas Bonnet stà. Il Franzos ha attatgà en la segunda da tschintg rundas ed e silsuenter stà fin la fin a la testa. Vital Albin ha sco segund pers 39 secundas sin Thomas Bonnet. Terz è cun Axel Zingle in ulteriur mountainbiker franzos. Manchentà il podest be per 20 secundas ha il segund svizzer, Nick Burki.

Albin turna a chasa cun aur ed argient

Per Vital Albin èsi gia la segunda medaglia al campiunadi d’Europa en Svezia. L’emprim di aveva el triumfà cun la staffetta svizra, il uschenumnà Team Relay, e gudagnà aur. La proxima gronda finamira è ussa il campiunadi mundial l’entschatta fanadur a Nove Mesto en Tschechia.

Triumf per Sina Frei

Nova campiunessa d’Europa tar las dunnas U23 è la Svizra Sina Frei. La giuvna da 18 onns da Turitg, avant in onn anc victura tar las junioras, ha gudagnà surprendentamain aur avant la Svedaisa e favurita Jenny Rissveds. Frei è stada bun ina minuta pli sperta che Rissveds. Davos l’Englaisa Evie Richards ha cun Alessandra Keller sco quarta anc ina segunda svizra fatg ina buna figura.

Artitgels legids il pli savens