Siglir tar il cuntegn
Inhalt

Naziunal/Internaziunal Victoria stentusa per Stan Wawrinka

Stan Wawrinka ha cuntanschì ils otgavelfinals al turnier da tennis a Monte-Carlo. Il Romand ha gudagnà ses emprim gieu sin sablun encunter il Tudestg Philipp Kohlschreiber en dus sets, dentant cun bregias cun 7:6 e 7:5.

Stan Wawrinka
Legenda: Stan Wawrinka ha cumenzà la stagiun sin sablun cun ina victoria. Keystone

La partenza en la stagiun sin sablun ha Stan Wawrinka mess avant in zic auter. Gia en l’emprim game ha il giugader da Losanna stuì laschar far in break. Silsuenter è Wawrinka bain stà il meglier giugader, el n’è dentant betg stà fitg effizient. Da 13 schanzas da break ha Wawrinka pudì nizzegiar sulet 3.

En la proxima runda frunta Stan Wawrinka sin il Franzos Gilles Simon (ATP 18) ch’abitescha en Svizra. Da tschintg duels ha Wawrinka gudagnà trais. Il davos ha il Svizzer battì Simon al French Open 2015 cler en 3 sets.

Terrada per Djokovic

Per il numer 1 dal mund e grond favurit Novak Djokovic è il turnier da Monte Carlo gia a fin. Il Serb ha pers en la segunda runda encunter il Tschec Jiri vesely (ATP 55) en trais sets cun 4:6, 6:2 e 4:6. Per Djokovic è quai stà pir la segunda terrada en ses 30avel gieu quest onn. La fin favrer aveva el stuì dar si en il quartfinal da Dubai encunter il Spagnol Feliciano Lopez. En 9 dals davos 10 turniers ha Novak Djokovic mintgamai triumfà.

RR novitads 14:00