Siglir tar il cuntegn
Inhalt

Naziunal/Internaziunal Uss er Cologna – dus triumfs grischuns en dus dis a Lai

A Lantsch ha Dario Cologna gudagnà la segunda etappa dal Tour de ski. Per el è quai la 22avla victoria en la cuppa mundiala. La victoria al saja reussida cun ina prestaziun tactica e tecnica perfetga, scriva l'agentura da novitads svizra SDA.

En la cursa da 15 km en il stil classic ha il Jauer battì il Casac Alexej Poltoranin per 60/100avels. Terz è vegnì il Norvegiais Martin Johnsrud Sundby cun 13,1 secundas retard. Sper Dario Cologna che ha festegià sia emprima victoria dapi dus onns ha er persvadì il Svizzer Jonas Baumann. El è vegnì 11avel.

L'ultima giada aveva Dario Cologna gudagnà in schaner 2015 a Rybinsk ils 15 km en stil da skating. Cun la victoria da questa dumengia ha Cologna reducì ses retard sin il victur da l'emprima etappa, sin Sergej Ustjugow, ed è uss segund en il classament total intermediar dal Tour de ski.

Tar las dunnas persvada Nathalie von Siebenthal

Suenter Laurien van der Graaff ha er Nathalie von Siebenthal realisà in top-resultat a Lai: En la segunda etappa dal Tour de ski a Lai è la Bernaisa currida sin plazza otg. Ses meglier resultat en la cuppa mundiala è in’otgavla plazza.

La cursa sur 10 kilometers en stil classic ha gudagnà la norvegiaisa Ingvild Flugstad Östberg. Uschia curra ella sper Laurien van der Graaff via a la testa dal classament intermediar dal Tour de ski. Sco a Nadine Fähndrich ed a Lydia Hiernickel n’èsi er reussì a Laurien van der Graaff betg da rivar tranter las meglras 30 curriduras da la cursa da la dumengia.

Laurien van der Graaf aveva procurà in sonda per in success grischun

La passlunghista grischuna Laurien van der Graaff aveva gudagnà cun il sprint sia emprima cursa da la coppa mundiala e quai quasi davant la porta chasa. Secunda era vegnida l'Americana Sophie Caldwell, terza la campiunessa mundiala da la Norvegia, Maiken Caspersen Falla.

RR novitads 12:00++

Program dal Tour de ski a Lai

Dumengia 31-01

  • 10:30 partenza singula umens – 15 km en stil classic
  • 15:00 partenza singula dunnas – 10 km en stil classic

Glindesdi 01-01

  • 11:00 persecuziun dunnas – 10 km en stil liber
  • 13:00 persecuziun umens – 15 km en stil liber