Tenor la procura publica dad Innsbruck sajan ulteriuras persunas vegnidas arrestadas, interrogadas e puspè laschadas liber ils ultims dis. Quai ha rapportà Hansjörg Mayr, pledader da la procura publica Innsruck a l'Agentura da novitads austriaca. Ulteriurs process penals hajan ins mess en moviment. Sche e tge sportists che sajan pertutgads n'ha la procura publica betg ditg.
Nagin suspect envers Cologna
Tar ina da las persunas arrestadas sa tractia tenor la gasetta austriaca «Kronezeitung» d'in austriac da 33 onns ch'è dapi la stagiun passada en il team da service dals passlunghists svizzers. El haja tranter auter er gì da far cun Dario Cologna.
La procura publica dad Innsbruck ha dentant accentuà envers l'Agentura da novitads austriaca che Cologna sez na vegnia betg suspectà. En connex cun el n'haja dà nagina arrestaziun, ha declerà Mayr.
RR novitads 16:00
