Siglir tar il cuntegn
cuntegn

Naziunal/Internaziunal Ulteriura victoria avant las vacanzas

La naziunala Svizra da ballape resta sin buna via direcziun campiunadi mundial il 2018 en Russia. L’equipa da Vladimir Petkovic ha er gudagnà il 6avel gieu da qualificaziun. Ils Svizzers han battì ordaifer las Inslas Feroe cun 2:0.

La Svizra ha gudagnà suveran il gieu a Torshavn encunter las Inslas Feroe ed uschia dumagnà il test da caracter. Ils Svizzers han dà en il tun e dictà il gieu a partir da l’emprima minuta. En la 36avla minuta ha il reschissur d’amez Granit Xhaka sajettà il 1:0 ord bun 16 meters. Xherdan Shaqiri ha lura fatg tut cler cun ses 2:0 en la 59avla minuta.

Vacanzas da stad

Per la naziunala Svizra èsi gia stà la 7avla victoria en seria, la davosa avant las vacanzas da stad. La fin avust cuntinuescha la qualificaziun cun il gieu da chasa a Son Gagl encunter l’Andorra. Silsuenter suondan anc ils gieus ordaifer encunter la Lettonia ed a Basilea encunter l’Ungaria avant ch’i vegn, va tut sco quintà, tar in «final» ordaifer encunter il Portugal ch’ha battì la Lettonia cun 3:0 e resta uschia sin ils chaltgogns als Svizzers.