Teater e minieras da charvun

Las minieras da charvun han marcà durant tschientaners Lens e conturn. Oz èn ellas serradas. Nus avain visità ina miniera e chattà en quella in teater.

Ina miniera da charvun a Lens.

Legenda da maletgs: La Base 11/19 ina miniera da charvun a Lens – oz vegn fatg là teater. RTR, E. Berther

Chasas dals miniers serradas.

Legenda da maletgs: Las chasas dals miniers a Lens – serradas. RTR. E. Berther

Durant trais tschientaners ha l’explotaziun da charvun marcà la citad da Lens e sia regiun. Numerusas minieras, crests cun material d’explotaziun, chasas per ils miniers - tut anc da vesair. Charvun na vegn betg pli chavà. Ma per ils abitants da Lens è l’industria colliada fitg ferm cun lur vita en questa regiun en il nord da la Frantscha. Miniers da tuttas naziunalitads èn vegnids a Lens per lavurar – ed èn restads. Uschia pon ins er entupar en questa citad persunas che discurran polac, talian ed autras linguas.

En la Base 11/19 – ina miniera da charvun ch’ins po anc visitar – è entant s’installà in teater. I vegn fatg teater en las anteriuras duschas e bogns dals miniers. Dapi l'onn 1998 visitan persunas da lunsch enturn quest teater fitg spezial.