Lens – ils megliers fans dal ballape

Lens senza il ballape - quai na pon ins strusch s'imaginar. Ina citad cun bun 30'000 abitants ed in stadion da ballape per 35'000 aspectaturs. Quai funcziuna mo sche blers van a guardar. Il ballape - quel tutga tar Lens.

Differents objets da fans en vitrinas. In t-Shirt, ina schlingia, Bandieras, bindels. La vopna dal club è cotschen e melen cun scret RCL lien

Legenda da maletgs: Fotografias, schlingias, pullovers, gasettas – objects dals fans. RTR, E. Berther

Lens – na fiss betg Lens senza il RC Lens. In club da ballape cun in’istorgia ch’è colliada cun las minieras da charvun. Enfin ils onns 60 vegnivan lavurers da tut las naziuns a lavurar en las minieras, tranter auter er giugaders da ballape. Schefs da las minieras han onns a la lunga manà e finanzià il club da ballape. Las minieras na datti betg pli. Fans da ballape, da quels datti dentant fitg blers a Lens.

Era insatge per il museum

Actualmain gioga il RC Lens en segunda liga, tuttina visitan vers 35'000 aspectaturs mintga gieu. E l’atmosfera è unica.

In gond bajetg cun fassadas enturn enturn da glas. In tschiel neblì Davontiers in plaz da betun cun tranteren "dünas" da pastg.

Legenda da maletgs: Louvre Lens – il museum è vegni avert il 2012 per purtar nov schlantsch en ina regiun che patescha economicamain. RTR, E. Berther

Quest fatg ha era il museum Louvre a Lens prendì sco chaschun da far in'exposiziun tut speziala per il temp da l’Euro 2016. In'exposiziun cun objects dals fans «les supporters». Mintga object ha in'istorgia persunala. I dat pullovers, cudeschs cun plans da gieus, bigliets etc. Entras quest'exposiziun fitg persunala èn er persunas vegnidas en il museum che n'eran anc mai stadas en quest bajetg.