Siglir tar il cuntegn
Inhalt

UEFA EURO 2016 Euro 2016 - ils gieus dals 22-06-2016

L'Ungaria, l'Islanda ed il Portugal sa qualifitgeschan per l'otgavelfinal. Medemamain er l'Italia, la Belgia e l'Irlanda. Per l'Austria e la Svezia è il campiunadi europeic però a fin suenter la fasa da gruppa.

Alessandro Schoepf che ha sajettà il sulet gol da l'entir campiunadi per l'Austria
Legenda: Alessandro Schoepf ha sajettà il sulet gol da l'entir campiunadi per l'Austria Keystone
In giugader da l'Islanda sajetta in gol cunter ils Austriacs
Legenda: L'emprim gol per l'Islanda è gia succedì avant pausa. Keystone

Islanda - Austria 2:1

I n'è betg stà il gieu dals Austriacs. Gia suenter 18 minutas ha Bödvarsson sajettà il 1:0 per l'Islanda. En la 37avla minuta avessan ils Austriacs gì la pussaivladad d'egualisar entras in penalti. Ma Dragovic ha tutgà mo la pitga dal gol. La segunda mesadad dal gieu ha lura schluccà la situaziun. L'Austria ha pudì sajettar ses emprim gol dal campiunadi. Alessandro Schöpf ha laschà sperar in mument l'Austria. Il gol decisiv per l'Islanda ha fatg Traustason en il temp supplementar. En l'otgavelfinal frunta l'Islanda cun quai sin l'Engalterra.

Balazs Dzsudzsak po traglischar - el ha fatg dus gols per l'Ungaria.
Legenda: Balazs Dzsudzsak po traglischar - el ha fatg dus gols per l'Ungaria. Keystone

Ungaria - Portugal 3:3

Il gieu Ungaria cunter Portugal è stà in gieu cun blers gols. La partida è adina puspè stada egualisada. L'emprim ha Gera sajettà il 1:0 per l'Ungaria. En la 42avla minuta ha Nani egualisà la partida. Tschintg minutas pli tard ha Dzsudzsak puspè sajettà ils Ungarais en avantatg e mo trais minutas suenter quest gol ha Ronaldo egualisà. Dzsudzsak ha lura danovamain tutgà il gol, e quai en la 55avla minuta. Ed er Ronaldo ha pudì brigliar. El ha danovamain egualisà il gieu ch'è ì a fin cun in pari 3:3. En la proxima runda frunta l'Ungaria sin la Belgia. Il Portugal gioga lura cunter la Croazia. E la Germania frunta sin la Slovachia.

Giugaders da ballape da la Belgia.
Legenda: Ils giudaders da la Belgia sa legran dal tard gol da Nainggolan. Keystone

Svezia - Belgia 0:1

La squadra naziunala da la Svezia n’ha betg pudì nizzegiar sia ultima schanza da sa qualifitgar per l’otgavelfinal. La Svezia perda cunter la Belgia cun 0:1. Fin la 84avla minuta han ils Svedais pudì sperar sin il «Lucky Punch», avant che Nainggolan ha tutgà cun in culp ord la distanza al 0:1. En la 63avla minuta aveva Ibrahimovic fatg in gol ch’è vegnì declera sco nunvalaivel. Uschia va la gronda carriera dad Ibrahimovic en la squadra naziunala svedaisa a fin cun ina gronda dischillusiun.

Giugaders da ballape.
Legenda: Brady sajetta il gol decisiv cun il chau. Keystone

Italia - Irlanda 0:1

L’Irlanda è sa qualifitgada in extremis per l’otgavelfinal. Grazia al gol cun il chau da Brady en la 85avla minuta han ils Irlandais stuschà la Svezia dal terz plaz en la gruppa E. Perquai che l’Italia era gia avant questa partida sa qualifitgada per l’otgavelfinal, ha il trenader laschà giugar in «Team B». L’Irlanda frunta en la proxima runda sin la Frantscha, entant che l’Italia sto giugar cunter la Spagna.

RR novitads 20:00