Siglir tar il cuntegn

UEFA EURO 2016 EURO 2016: ils gieus da venderdi ils 17 da zercladur

La Spagna gudogna er cunter la Tirchia e sa qualifitgescha uschia per l'8avel final. La Croazia e la Tschechia giugà in pari da 2:2. Il gieu tranter l'Italia e la Svezia è sta plain tensiun fin la fin. Pir en la 88avla minuta ha Eder lura procurà per l'avantatg talian da 1:0.

Giugaders spagnols festiveschan il prim gol da Nolito.
Legenda: Nolito (mez) giubilescha suenter ses gol en la 37avla minuta. Keystone

Spagna sa qualifitgescha per otgavelfinal

La Spagna gudogna er sia segunda partida da gurppa a l'EURO. Il defensur dal titel ha battì la Tirchia cun 3:0 ed è uschia gia sa qualifitgà per l'8avel final.Morata (34.) e Nolito (37.) han gia procurà avant pausa per cleras relaziuns. Curt suenter pausa (48.) ha Morata lura anc fatg il 3:0. Ils Tircs restan uschia senza puncts ed han uschia be pli ina schanza teoretica da vegnir ina runda vinavant.

Ni als Croats ni als Tschecs èsi fin la fin reussì da propi gudagnar la partida.
Legenda: Ni als Croats ni als Tschecs èsi fin la fin reussì da propi gudagnar la partida. Keystone

Croazia – Tschechia giogan in pari

La Croazia ha manchentà la qualificaziun anticipada per ils otgavelfinals. Il team da Cacic ha stuì esser cuntenta cun in 2:2 cunter la Tschechia a Saint-Étienne. Ditg manavan ils Croats cun 2:0.

Ils Croats han però dominà la partida ed han fatg lur emprim gol grazia a Perisic en la 37avla minuta. Rakitic ha lura auzà il resultat en la 59avla minuta suenter in sbagl da Hubnik sin 2:0.

Il Tschecs han pudì scursanir en la 76avla minuta entras Skoda. En la prolungaziun ha anc Necid fatg vulvì in penalty da mauns en l’egualisaziun. Ses team po sa legrar da l’emprim punct.

Partida cun consequenzas

La partida è però vegnida sumbrivada d'in scandal. En l'86avla minuta han fans croats sajettà petardas sin il plaz. Sinaquai ha l'arbiter interrut il gieu per 4 minutas. Silsuenter hai plinavant dà cravals tranter fans croats.
L'UEFA vegn ad instradar ina procedura d'inqusiziun. A la federaziun croata smanatschia in chastì sever, uschia l'UEFA.

Eder (dre.) ed Emanuele Giaccherini da l'Italia celebreschan suenter il gol decisiv.
Legenda: Citadin Martins Eder (dre.) ed Emanuele Giaccherini (san.) celebreschan suenter il gol decisiv. Keystone

«Squadra Azzurra» en otgavelfinals

A l’EURO en Frantscha ha l’Italia er gudagnà il segund gieu. La squadra da coach Conte è sa profilada en la gruppa E a Toulouse cun 1:0 cunter la Svezia e cuntanscha uschia ils otgavelfinals.

L’um dal gieu davart dals Talians è stà Eder. A l’attatgader èsi reussì en la 88avla minuta da transfurmar in pass da Zaza en il gol decisiv. Per la Svezia resta quai tar in punct. Ils Scandinavs ston en il gieu final cunter la Belgia gudagnar per anc avair ina schanza d’entrar en ils otgavelfinals.

RR novitads 17:00 / 20:00 / 23:00