Siglir tar il cuntegn

UEFA EURO 2016 EURO 2016: ils gieus da gievgia ils 16 da zercladur

La Germania e la Pologna giogan in pari da 0:0. L'Engalterra ha battì la Wales cun in 2:1 e a l'Irlanda dal Nord ha procurà per ina victoria istorica cunter l'Ucraina cun 2:0.

La Pologna e la Germania sa separan cun in pari.
Legenda: La Pologna e la Germania sa separan cun in pari. Keystone

Germania sto laschar plimas

La Germania sto sa cuntentar cun in pari da 0:0 cunter la Pologna. Ils Tudestgs han bain gì dapli dal gieu, n’han però strusch creà situaziuns privlusas per ils Polacs.

In sajet cun il chau da Götze (5.) ed in sajet da Özil (69.) èn stadas las meglras pussaivladads.

La squadra da Joachim Löw manchenta cunquai la qualificaziun anticipada per l'8avel final. En la tabella da la gruppa C restan ils Tudestgs sin plazza 1, quai cun tuttina blers puncts sco la Pologna.

Gareth McAuley da l'Irlanda dal Nord suenter ses culp tar il 1:0.
Legenda: Gareth McAuley da l'Irlanda dal Nord suenter ses culp tar il 1:0. Keystone

Emprima victoria d’EURO per Irlanda dal Nord

En il segund gieu da l’EURO en si’istorgia ha l’Irlanda dal Nord gudagnà per l’emprima giada insumma. Suenter il 0:1 cunter la Pologna en l’emprim gieu han ils ballapedists da l’insla verda battì l’Ucraina cun 2:0.

Il defensur McAuley ha curt suenter la pausa segirà l’avantatg cun in culp da chau. Bain han ils trumpants Ucranais fatg in zic squitsch en la fasa finala. Dentant han els directamain ids en in conter che McGinn ha transfurmà en in ulteriur gol – en l’ultima minuta da la prolungaziun.

Pervi d’in urizi da granella era il gieu vegnì interrut per curt temp en la 57avlal minuta.

Daniel Sturridge da l'Engalterra celebrescha la victoria.
Legenda: Daniel Sturridge da l'Engalterra celebrescha la victoria. Keystone

Sturridge deliberescha Engalterra

Daniel Sturridge ha sajettà l’Engalterra a l’emprima victoria da la gruppa B da l’EURO. L’attatgader da Liverpool ha tutgà il 2:1 cunter Wales en la 91avla minuta. Curt avant la pausa era Wales i en avantatg cun in culp liber direct da Bale. Qua ha il goli d’Engalterra fatg ina paupra figura.

Per ils dominants Englais ha lura Vardy egualisà il gieu suenter 56 minutas. La victoria dals «Three Lions» è meritada, pertge l’arbiter Brych aveva refusà a l’Engalterra dus pussaivels penaltis da maun. Cun 4 puncts surpiglia l’Engalterra la testa.

RR novitads 17:00 / 20:00 / 23:00