Cravals da fans - UEFA avertescha la Russia e l'Engalterra

Il comité executiv da l'UEFA ha avertì uffizialmain las duas associaziuns da la RUssia e l'Engalterra suenter ils acts da violenza da fans a Marseille e Nizza. Dettia quai danovamain cravals, stoppian ils dus pajais quintar da vegnir sclaus dal turnier.

Maletgs maltgierts curt avant la fin dal gieu er en il stadion: Fans englais curran en segirezza sur las barrieras or.

Legenda da maletgs: Maletgs maltgierts curt avant la fin dal gieu er en il stadion: Fans englais curran en segirezza sur las barrieras or. Keystone

Radund 40 persunas èn vegnidas blessadas en la Frantscha dal Sid pervi da cravals da violents fans da ballape. Ina persuna sa chatta en privel da vita. Curt avant la fin dal gieu han fans russ attatgà fans englais en il stadion a Marseille. L’UEFA avra ina procedura cunter l'associaziun russa.

En connex cun il gieu da l'EURO Engalterra cunter la Russia a Marseille hai dà la sonda grevs acts da violenza. Uss tira l'UEFA consequenzas.

Procedura cunter associaziun russa

La UEFA ha avert in’inquisiziun disciplinara cunter l’associaziun russa da ballape. I vegnia investigà pervi da cravals e sa cuntegnair rassistic, scriva l’Uefa. Cunter l’associaziun da ballape da l’Engalterra n’investighescha l’Uefa tenor atgnas indicaziuns betg.

Pervi da las charplinas tranter fans englais e russ èn radund 40 persunas vegnidas blessadas, 4 da quellas grevamain. Il minister da l'intern franzos Bernard Cazeneuve ha ditg ch'in fan englais saja en privel da vita. Charplinas hai era dà a l'intern dal stadion. Radund 1’200 policists èn stads en acziun.

«  Nus avain pudì evitar confruntaziuns anc pli nauschas.  »

Laurent Nuñez
prefect da la polizia, Marseille

Las autoritads franzosas han defendi l’agir durant las escalaziuns da fans ier saira a Marseille. Deplorablamain n’hajan ins betg pudì evitar in tschert numer da persunas blessadas, ha ditg il prefect da polizia da la citad Laurent Nuñez. La polizia haja però impedì confruntaziuns anc pli nauschas.

Associaziun da fans russa condemna ils cravals

L'associaziun russa dals fans da ballape ha condemnà vehementamain ils cravals da Marseille. L'uniun tema era effects negativs per il campiunadi mundial da ballape il 2018 en la Russia. Ils cravals sajan ina frida per tut ils fans russ ed ina frida per la Russia sco ospitant, uschia ha communitgà l'All Russia Association of Football Fans. L'associaziun ha appelà als fans da sustegnair l'equipa naziunala uschia che lezza na vegnia betg donnegiada.

Polizia federala svizra collavura era tar dumondas da segirtad

Segirar tals gieus da hooligans èn ina da las pli grondas sfidas per las polizias pertutgadas. Ellas dependan da collavuraziuns cun autras polizias, era dad auters stadis. Tranter auter era cun la polizia federala svizra.

RR novitads 06:00 / 12:00 / 14:00

Sapientiv nagins maletgs da TV

Ils maletgs dals excess en il stadion da Marseille n’ha l’Uefa sapientivamain betg mussà en televisiun. Ins haja tema ch’i dettia effects d’imitaziun, ha communitgà l’associaziun tetgala. Ord quest motiv na vegnan sur il signal internaziunal da TV er betg mussads maletgs da persunas nivas che curran sin il plaz tar il giugaders.