Montpellier è ina da las grondas citads en il sid da la Frantscha a l’ur da la Mar Mediterrana. En questa citad vivan oz bunamain 300’000 abitants. Igl è ina citad ruassaivla, malgrà che blera giuventetgna viva a Montpellier. Igl è numnadamain ina citad d’universitad. I vegn detg che mintga quarta persuna che viva a Montpellier saja s’inscritta a l’universitad. La part veglia da la citad viva da lur stretgas giassas cun ustarias dretg e sanester.
A Montpellier regia dentant pauca fevra da ballape. En questa regiun dominescha il rugby, quai è il sport numer 1. Tuttina è il club da ballape da Montpellier vegnì il 2012 surprendentamain campiun franzos.
Per ils gieus da gruppa encunter l’Albania, la Rumenia e la Frantscha sgola la naziunala svizra da ballape mintgamai en ils lieus da gieu, ina gia a Lens, lura a Paris ed a Lille.