WM94 – Svizra procura per spectacul ed euforia

En il segund gieu da gruppa al campiunadi d’Europa en Frantscha frunta la naziunala svizra da ballape sin la Rumenia. Il duel Svizra – Rumenia regorda vid il campiunadi mundial da ballape il 1994 en ils Stadis Unids.

Alain Sutter durant il gieu cunter la Rumenia il 1994.

Legenda da maletgs: Alain Sutter durant il gieu legendar il 1994 cunter la Rumenia, la Svizra aveva gudagnà cun 4:1. Keystone

Al campiunadi mundial avant 22 onns aveva la Svizra declassà la Rumenia ed uschia pudì sa qualifitgar per l’otgavelfinal. Ils Svizzers che vegnivan trenads da lezzas uras da l’Englais Roy Hodgson vevan battì ils Rumens a Detroit cun 4:1. Alain Sutter avant pausa, Stéphane Chapuisat e duas giadas Adrian Knup suenter pausa avevan sajettà ils gols. En l’otgavelfinal è il turnier dentant stà a fin per ils Svizzers suenter ina terrada da 0:3 encunter la Spagna.

La victoria da 4:1 encunter la Rumenia ils 22 da zercladur 1994 è anc oz ina da las grondas e pli spectaculars victorias insumma da la naziunala svizra da ballape ils davos decennis. Igl è stà in gieu cun bleras emoziuns ch’ils fans n’han anc oz betg emblidà.

A l’EURO 2016 vul la Svizra danovamain batter ils Rumens ed uschia procurar per in’ulteriura festa da ballape. Cun ina victoria en il segund gieu da gruppa fiss la Svizra er tant sco sa qualifitgada per l’otgavelfinal.

RR Actualitad 07:00