Ils giugaders ch’han dà lur gieu la saira avant van sulet ina duas uras a currer e far stretching. Auter vesa quai ora tar ils giugaders da reserva e quels ch’han giugà sulet intginas minutas. Per els datti in trenament durant l’avantmezdi.
Il suentermezdi po mintga giugader far tge ch’el vul. Tgi dat pingpong, auters dattan darts u gieus da cartas, intgins van a dar golf e tgi nizzegia er quai temp liber per ir tar il coiffeur. La saira van ils blers a tschaina zanuas en la citad da Montpellier, per l'ina per vegnir ord l’hotel e per l'autra per vesair autra glieud. Sortida na datti dentant nagina, tanta libertad na survegn l’equipa da Vladimir Petkovic tuttina betg. La finala èn ils Svizzers en Frantscha per far ina buna parita ed avair success a quest campiunadi d’Europa da ballape.