La votaziun davart il Cosovo è ida piz a cup. 28 commembers da l’UEFA han vuschà persuenter, 24 commembers encunter e duas vuschs n’èn betg stadas valaivlas. Gronda opposiziun hai dà da la Serbia.
Gia al congress da la FIFA, ils 12 e 13 da matg, pudess il Cosovo er daventar commember da la Federaziun internaziunala da ballape. Uschia pudess il Cosovo schizunt anc avair il dretg da giugar la qualificaziun per il proxim campiunadi mundial 2018 en Russia. Questa qualificaziun cumenza l’atun 2016. Il comité olimpic aveva renconuschì il giuven stadi dal Balcan gia la fin dal 2014.
Tge fan Shaqiri e Xhaka?
La decisiun da l’UEFA da prender si il Cosovo sco commember è per la Federaziun da ballape svizra da gronda relevanza. En l’equipa naziunala dattan numnadamain gist quatter giugaders cun ragischs cosovaras, quai èn Xherdan Shaqiri, Granit Xhaka, Valon Behrami e Shani Tarashaj. Er tar las equipas naziunalas dals juniors dattan plirs giugaders dal Cosovo. Il mument n’è dentant anc betg cler sche quels giugaders dattan en l’avegnir per il Cosovo u vinavant per la Svizra.
RR novitads 15:00