Siglir tar il cuntegn
Inhalt

Naziunal/Internaziunal Tschivel d'entschatta per quatter ulteriurs da Tavau

Il trenader naziunal da hockey, Patrick Fischer, ha nominà otg novs giugaders per la segunda part da la preparaziun per il campiunadi mundial a Moscau. Tranter quels novs giugaders sa chattan gist quatter da Tavau.

Il trenader naziunal da hockey Patrick Fischer.
Legenda: Il trenader naziunal da hockey Patrick Fischer cloma, ils giugaders da Tavau suondan. Keystone

Tar ils quatter giugaders da Tavau sa tracta quai dal defensur Félicien Du Bois e dals attatgaders Andres Ambühl, Marc Wieser es ses frar Dino Wieser. En radund in’emna vegna lura anc vitiers in ulteriur giugader da Tavau, numnadamain l’attatgader Samuel Walser. Lez ha actualmain anc da curar ina blessura.

Duas partidas cunter la Tschechia

Al cader appartegn il defensur da Tavau Noah Schneeberger, ch’ha gia giugà quest’emna cun la naziunala svizra ordaifer cunter la Svezia. L’emprim giu aveva la Svezia gudagnà cun 5:3, il segund aveva ella pers cun 1:5.

Betg al campiunadi mundial va il goli Leonardo Genoni. Il goli dal HCD che mida tar il SC Berna vul far ina pausa. El stettia la stagiun che vegn puspè a disposiziun a la naziunala svizra.

Proxim’emna gioga la Svizra lura duas giadas encunter la Tschechia, mesemna a Visp e venderdi a Bienna. Il campiunadi mundial ha lieu a Moscau, dals 6 enfin ils 22 da matg 2016.

Sportissimo 17:00