Siglir tar il cuntegn

Header

cuntegn

Naziunal/Internaziunal Trenader da las dunnas Hans Flatscher sa retira

Il schef-trenader da las skiunzas svizras Hans Flatscher sa retira sin la fin da la stagiun 2017/18. Sco raschun per sia demissiun numna el la famiglia. El veglia ademplir sia rolla da bab da famiglia. En sia funcziun sco schef-trenader saja il temp ina sfida.

Per el saja impurtant da pudair accumpagnar pli stretg ses uffants ils proxims onns, uschia Flatscher. Sco schef-trenader en la cuppa mundiala na saja quai per raschuns da lungas absenzas savens betg pussaivel.

Grond success cun las skiunzas svizras

L'Austriac da 49 onns è maridà cun l'anteriura campiunessa mundiala dal slalom gigant Sonja Nef, il pèr ha trais uffants. Flatscher è gia dapi 20 onns activ sco trenader en la cuppa mundiala, dapi 6 onns è el schef-trenader da las dunnas svizras ed ha festivà en quella funcziun gronds success; l'ultim als giugs olimpics a Pyeongchang u er als Campiunadis mundials a San Murezzan.

Swiss-Ski deplorescha la decisiun

Stéphane Cattin, il directur alpin da Swiss-Ski deplorescha l'abdicaziun da Hans Flatscher. Ins saja però en discussiun per chattar in'autra funcziun per Flatscher e dad uschia profitar er en l'avegnir da sias abilitads.

RR novitads 16:00

Artitgels legids il pli savens