Siglir tar il cuntegn

Header

cuntegn

Naziunal/Internaziunal Trais giugaders dal HCD a Pyeongchang

Il defensur Félicien Du Bois ed ils dus attatgaders Andres Ambühl ed Enzo Corvi fan part da la squadra naziunala da hockey.

Il trenader naziunal Patrick Fischer ha nominà ses cader per ils gieus olimpics il favrer a Pyeongchang en la Corea dal Sid. Tranter ils 25 giugaders figureschan er trais dal Club da hockey da Tavau. Quai èn il defensur Félicien Du Bois ed ils dus attatgaders Andres Ambühl ed Enzo Corvi che po uschia sa participar per l’emprima giada a gieus olimpics.

Da questa equipa ch’ha gudagnà avant quatter onns e mez argient als campiunadis mundials a Stockholm èn anc 7 acturs da la partida (Eric Blum, Raphael Diaz, Philippe Furrer, Andres Ambühl, Simon Bodenmann, Denis Hollenstein e Simon Moser). Per 18 da 25 giugaders nominads èn quests gieus olimpics ina premiera.

Betg nominads èn tranter auter Joel Genazzi da Losanna, Tanner Richard da Genevra e Damien Brunner da Lugano ch’è dapi in temp blessà.

La naziunala Svizra dat ses emprim gieu a Pyeongchang ils 15 da favrer encunter il Canada. Ils dus ulteriurs adversaris da gruppa èn la Tschechia e la Corea dal Sid.

L’equipa naziunala da las dunnas ch’ha gudagnà la medaglia da bronz avant quatter onns a Sotschi cumenza il turnier olimpic gia ils 10 da favrer encunter la Corea dal Sid. Plinavant frunta l’equipa da Daniela Diaz sin il Giapun e la Svezia.

RR novitads 16:00

Artitgels legids il pli savens