Siglir tar il cuntegn
cuntegn

Naziunal/Internaziunal Tour de ski: Dario Cologna sin il podest

En il skiatlon da 2 giadas 10km è Cologna daventà terz. En il classament general da la Tour de Ski è el ussa sin plazza quatter. Cologna è sa mussà l'entir temp da la cursa davanttiers. Suenter 14km è el perfin vegnì da sa metter ordavant in pau a la gruppa.

Legenda: Guardar il video Cologna è suenter prest in onn puspè sin podest. Durada 01:27 minutas.
Or da Telesguard dals 03.01.2017.

Ensemen cun Ustjugow e Northug è el ì ensemen en l'ultima grada. Usjugow che ha schon gudagnà las emprimas duas etappas dal Tour de ski en Val Müstair è qua sa mussà sco pli ferm sprinter. Cun Toni Livers (22.) e Jonas Baumann (28.) èn dus ulteriurs svizzers ids en ils rangs da puncts.

Cologna ha cuntanschì l'emprim plaz da podest dapi radund in onn. Ils 6 da schaner 2016 aveva el, er ad Oberstdorf fatg il segund plaz sur 15km classic.

Discletg ha Sundby gì durant il skiatlon. Il norvegiais è en la tschintgavla runda dad otg ì fauss ed ha uschia crudà or da la decisiun per las secundas da bonus. Là è Cologna vegnì segund davos Ustjugow.

En il classament general maina Ustjugow suenter la terza victoria cun 29,5 secundas avant Sundby. Terz, cun 1:09 minutas è il canadais Alex Harvey. Cologna è sa megliurà per duas plazzas sin il quart rang. El cumenza mesemna la cursa da persecuziun da 15km cun 1:25 minutas retard sin Ustjugow.

RR novitads 17:00