Siglir tar il cuntegn

Naziunal/Internaziunal Timea Bacsinszky va sveltamain per quarta victoria da turnier

Timea Bacsinszky curunescha si’emna persvadenta a Rabat cun la victoria dal turnier. En il final n’ha ella laschà nagina schanza a la Novzelandaisa Marina Erakovic e gudogna cun 6:2 e 6:1.

Timea Bacsinszky.
Legenda: Dastga sa legrar sur da la quarta victoria da sia carriera: Timea Bacsinszky. Reuters/Archiv

Timea Bacsinszky festivescha cun ses success a Rabat gist trais premieras: Igl è l’emprim titel da questa stagiun, l’emprim sin sablun e l’emprim sin funs african. Sias trais victorias da turnier da fin qua eran tuttas reussidas sin la plazza dira ed en l’America dal Sid respectivamain en l’Europa.

Erakovic bainduras surdumandada

Cunter Marina Erakovic (WTA 186) n’ha Bacsinszky da nagin temp stuì temair da perder. Cunter sia concurrenta ha ella gia en l’emprim game fatg in break. Suenter ha ella procurà per Erakovic per problems nunschliabels cun in gieu variabel. Cunzunt il back-hand da la giuvna da 26 onns ha persvadì.

Tar l’agen servis n’ha quai dà nagina schanza cunter Bacsinszky. Ella n’ha laschà nagin break ad Erakovic.

Magunà stupent il Fed Cup

Il titel da Bacsinszky è la perfetga reacziun sin sia fin d’emna disgraziada dal Fed Cup. Avant duas emnas aveva la Romanda pers omaduas partidas da singul cunter la Tschechia, la Svizra aveva uschia manchenta l’entrada en il final.

RR novitads 17:00 / Sportissimo 17:00