Siglir tar il cuntegn

Header

Navigaziun

natascha badmann cun velo
Legenda: La svizra Natascha Badmann ha gia gudagnà 6 giadas aifer 8 onns il Ironman a Hawaii. Keystone
cuntegn

Naziunal/Internaziunal Tgi che gudogna l’Ironman Hawaii è il retg dal triatlon

L’Ironman da Hawaii è il pli vegl triatlon sur la distanza lunga cun 3,86 kilometers nudar, 180 kilometers cun velo e 42,2 kilometers currer, pia la distanza da maraton.

Il 1978 ha quest Ironman gì premiera. Oz è quai la pli enconuschenta ed impurtanta cursa da triatlon. Quel gudogna a Hawaii astga er mintgamai sa numnar il retg da triatlon u il campiun mundial.

Dira qualificaziun

Dapi mez ils onns otganta ston ton ils amaturs sco er ils profis mintgamai sa qualifitgar per astgar parter al Ironman Hawaii. Ina qualificaziun che pretenda bler sco quai che Norbert Bieler da Panaduz di, el ch’è gia sa participà trais giadas a Hawaii, quai cun 30, 40 e 50 onns. Dals bun 2'000 participants van oz per onn er bun 50 Svizzers a la partenza. Blers van gia in’emna avant a Hawaii per sa climatisar. Pertge l’Ironman Hawaii na pretenda betg sulet tut corporalmain e mentalmain, er las relaziuns climaticas, oravant tut il vent e la chalira, fan savens grev als triatlets.

Cun delegaziun svizra - e speronzas...

Ina dals gronds stars al Ironman da Hawaii è la Svizra Natascha Badmann ch’ha gudagnà questa cursa da prestige gist 6 giadas tranter il 1998 ed il 2005. Oz auda Daniela Ryf tranter las grondas favuritas a Hawaii. Il 2014 è la triatleta da Soloturn vegnida segunda.