Siglir tar il cuntegn
Inhalt

Naziunal/Internaziunal Terrada per las dunnas dal CC Flem

Las dunnas da curling da Flem cun skip Binia Feltscher èn ditg stadas enavos cunter il team da Baden. Malgrà ch’ellas han pudì sminuir il retard en ils dus davos ends, n’hai betg tanschì per la victoria. Las dunnas da Baden cun il skip Alina Pätz en uss las campiunessas svizras.

Plirs teams da curling da las dunnas sin in podest
Legenda: Il podest da las dunnas, cun il team da Flem a sanestra. RTR, Carlo Albin

Flem cun Binia Feltscher, Irene Schori, Franziska Kaufmann e Carole Howald eran suenter quatter ends gia cun 1:4 en retard, e suenter otg ends stevi 4:7. La finala han las Grischunas mo anc pudì plazzar mintgamai in crap en ils dus davos ends, uschia che la terrada è stada inevitabla.

Enstagl Flem va Baden a Peking

Baden Regio, las campiunessas mundialas dal 2015, èn uschia sa qualifitgadas per il campiunadi mundial da quest onn. En in mais pon skip Alina Pätz ir a Peking ensemen cun Nicole Schwägli, Marisa Winkelhausen e Nadine Lehmann.

Campiun dals umens è Genevra

Il club da curling Genevra cun il skip Peter de Cruz gudogna il final encunter il club da curling Dübendorf cun 8:6 e daventa uschia campiun svizzer. Duas giadas è il team da Genevra ì en avantatg, il team da Dübendorf cun il skip Felix Attinger, figl dal campiun d’avant blers onns Peter Attinger, ha dentant adina puspè pudì egualisar. Uschia han suenter duas uras e mez ils davos craps decidì la partida en favur dal team da Genevra.

Per Genevra cun Valentin Tanner, Peter De Cruz, Claudio Pätz e Benoît Schwarz, munta questa victoria era la qualificaziun per ils campiunadis mundials ad Edmonton (Canada), che han lieu entschatta avrigl.

RR novitads 14:00