Tennis: Golubic en l'otgavelfinal da Guangzhou

La Svizra ha battì la Tscheca Denisa Allertova cun 3:6, 6:3, 7:6. Belinda Bencic e Stefanie Vögele han entant incassà terradas.

Giugadra da tennis svizra.

Legenda da maletgs: Viktorija Golubic stat suenter ina partida intensiva en l'otgavelfinal. Keystone

Victorija Glubic ha cuntanschì la segunda runda dal turnier da WTA a Guangzhou en la China. La Turitgaisa da 23 onns ha battì la Tscheca Denisa Allertova suenter passa duas uras en trais sets cun 3:6, 6:3 e 7:6. En la proxima runda frunta Golubic sin la victura da la partida tranter Sara Errani da l'Italia e Xinyun Han da la China.

Bencic betg sco Golubic

Er Belinda Bencic ha gì a Tokio in si e giu dals sentiments cunter Caroline Wozniacki. Cun in resultat intermediar da 2:6 e 2:5 era ella curt avant crudar or. La Svizra ha dentant pudì egualisar cun gudagnar tschintg games en seria. Durant il percurs final n’ha elladentant betg pli gì schanza cunter la Danaisa. Per Bencic èsi stà l’emprima cumparsa suenter la terrada da trais rundas als US Open.

Vögele out a Seoul

Al turnier da WTA a Seoul ha Stefanie Vögele pers en l'emprima runda cunter l'Americana Bethanie Mattek-Sands. Quai en trais sets cun 2:6, 6:3 e 3:6. Actualmain è Vögele il numer 101 dal mund, Mattek-Sands il numer 133.

La Svizra da 26 onns è dapi l'avrigl ad Istanbul mintga giada crudada or en l'emprima runda ad in turnier da WTA.

RR novitads 12:00 / 15:00