Per Stan Wawrinka è il turnier da Sontg Petersburg a fin suenter il quartfinal. Il Svizzer ha pers cunter il Canadais Denis Shapovalov en dus sets – cun a 4:6 e 5:7. Per Wawrinka èsi la segunda terrada en la terza partida cunter il Canadais.
Wawrinka ha cunzunt manchentà da nizzegiar bunas schanzas, sulet ina dad otg schanzas da break ha el realisà. En il segund set ha el pudì egualisar in baud retard da break, curt suenter ha el dentant puspè stuì dar giu il service.
Suenter exact 100 minutas ha Denis Shapovalov nizzegià sia emprima balla da match per la victoria. El frunta en il mezfinal sin il Russ Andrej Rublew.