Siglir tar il cuntegn

Naziunal/Internaziunal Tennis a Bienna: Sconfitta en il final per «Martimi»

Il duo svizzer Martina Hingis-Timea Bacsinszky è vegnì battì en l’otgavel final dal turnier WTA da Bienna dal duo cun la rumena Monica Niculescu e la taiwanaisa Su-Wei Hsieh.

Ellas duas en il gieu.
Legenda: Malgrà la sconfitta en il final han Timea Bacsinszky (a san.) e Martina Hingis fatg in facit positiv. Keystone

Otg mais suenter ch’ellas han gudagnà ensemen la medaglia d’argient als Gieus olimpics a Rio de Janeiro finescha er il segund turnier cuminaivel cun ina terrada en il final.

Anc nagina victoria per Hingis cun ina partenaria svizra

Las duas svizras perdan tar l’emprima ediziun dal Ladies Open a Bienna il Final cunter Hsieh Su-Wei e Monica Niculescu cun 7:5, 3:6 7:10. Martina Hingis, ch’è actualmain sin l’otgavel rang da la rangaziun mundiala da dubel, avess pudì gudagnar a Bienna per l’emprima giada in turnier da dubel cun ina partenaria svizra.

«Martimi» tuttina cuntentas

Malgrà la sconfitta en il final han Timea Bacsinszky e Martina Hingis fatg in facit positiv. Sin la dumonda, pertge ch’il dubel Bacsinszky/Hingis, u era «Martimi», co quai ch’el vegn numnà dapi Rio, funcziuna uschia bain ensemen, respunda Timea Bacsinszky: «Nus s’enconuschain fitg bain e nus eran dapi il cumenzament adina onestas ina cun l’autra».

Martina Hingis agiunta: «Sch’i na funcziuna betg e sche nus vegnin en las stretgas sche sveglia ina l’autra. Igl era grondius, da giugar a Bienna cun Timea e frestgentar in zic l’atmosfera olimpica.»

RR novitads 15:00