Hirscher che manava anc suenter l’emprim percurs ha la finala pers 45 tschientavels sin Ligety, e Pinturault ha pers 88 tschientavels. Crudà sper il podest giu è il Tudestg Felix Neureuther sco quart. 5avel vegn il Svedais Matts Olsson ed 6avel il Talian Robert Nani ch’era segund suenter l’emprim percurs.
Carlo Janka 11avel - e meglier Svizzer
Meglier Svizzer vegn Carlo Janka. Il skiunz da Sursaissa ha manchentà per pauc in plaz aifer ils top 10 e vegn 11avel cun in retard da 2,23 secundas. L’auter Grischun, Gino Caviezel, sto sa cuntentar cun il 25avel plaz. Elia Zurbriggen vegn 27avel e Justin Murisier 30avel.
Ted Ligety è e resta sissum il podest
Ted Ligety resta pia il retg en la disciplina slalom gigant. Il dominatur dals davos onns en questa disciplina aveva gia gudagnà aur als davos dus campiunadis mundials: il 2011 a Garmisch-Partenkirchen ed il 2013 a Schladming.
Avant 1 onn era Ligety vegnì campiun olimpic en il slalom gigant. En questa stagiun aveva Ligety dentant gudagnà pir in slalom gigant. Quai l’emprova generala l’entschatta december sin la plaunca da Beaver Creek. Ses rival Marcel Hirscher era perencunter stà en quatter da tschintg slaloms gigants sisum il podest. Al punct culminant da la stagiun sto Hirscher dentant sa cuntentar cun argient sco gia avant 2 onns a Schladming.