Tavau sto uss gudagnar en la CHL

Il HCD ha pers trais dals emprims quatter gieus en la Champions Hockey League. Per vegnir ina runda pli enavant sto Tavau uss gudagnar ils dus proxims gieus.

El sin il glatsch davant il gol.

Legenda da maletgs: En l’ultim gieu cunter Friburg ha Mauro Jörg fatg in gol ed in assist. Keystone

Strusch che la Champions Hockey League ha cumenzà ha il Club da hockey da Tavau gia l'aua fin culiez. Dils emprims quatter gieus da gruppa ha l'equipa dad Arno del Curto gudagnà in sulet, quel a chasa encunter ils Cardiff Devils da la Valisa, il Wales.

Ordaifer èn els lura sa blamà encunter quels exots da hockey ed han pers suenter prolungaziun.

Uss spetgan dus gieus decisivs

Els ultims dus gieus da gruppa spetga uss in'equipa dad auter caliber, il club da la Tschechia Liberec. Igl emprim ordaifer, in'emna pli tard lura a chasa. Per vegnir ina runda enavant sto Tavau gudagnar omaduas giadas.

Ina giada bastass ina victoria suenter prolungaziun, almain ina giada sto Tavau gudagnar entaifer 60 minutas. Tavau sto pia gudagnar almain tschintg dals sis puncts pussaivels.

Ina situaziun sco en ils playoffs

Per l’attatgader da Tavau Mauro Jörg èsi ina situaziun sco uschiglio la primavaira en ils playoffs: «Igl è sco sch’ins fiss enavos en quels ed ins astgass perder gnanc ina suletta giada pli, uschiglio è tut a fin.» Il squitsch saja grond, ma era la tensiun e la concentraziun sajan autras sco durant in gieu ordinari en il campiunadi svizzer.

La Champions Hockey League dentant saja uschia ni uschia insatge auter. Gieus encunter adversaris uschè ferms sco Liberec dettian adina anc in «kick» supplementar.

Igl emprim ordaifer, lura a chasa

L’emprim da quels dus gieus decisivs en la Champions Hockey League dat Tavau mardi, ils 3 d’october a las 17:00 uras a Liberec, il segund lura mesemna, ils 11 d’october a las 19:45 uras a chasa encunter il medem adversari.

RR actualitad 17:30