In grond success als gieus olimpics en la Norvegia ha tranter auter l’Engiadinaisa Talina Gantenbein pudì festivar. Ella è turnada gist cun duas medaglias, aur en il skicross ed argient en la concurrenza d’equipa cun ski- e snowboardcross. Per la giuvna sportista da 18 onns il pli grond success enfin ussa en sia giuvna carriera.
Talina Gantenbein aveva pir avant intgins mais decidì da terminar sia carriera da ski alpin e metter il focus cumplainamain sin il skicross. Ch’ella ha be quatter mais suenter quella decisiun pudì triumfar avant l’entira concurrenza mundiala, e quai gist als gieus olimpics, fa tut anc pli spezial.
Grond bainvegni a Kloten
Il glindesdi (22-2) enturn mezdi è l’entira delegaziun svizra vegnida beneventada freneticamain a la plazza aviatica a Kloten. Geniturs, parents ed amis han procurà cun bandieras e stgellas per in grondius bainvegni. Tranter tut ils atlets sa chapescha er la gronda dominatura da quests gieus olimpics da giuvenils, Aline Danioth dal chantun Uri. La skiunza da 17 onns ha gudagnà quatter medaglias a Lillehammer. Ella ha triumfà en il slalom ed en la super-cumbinaziun, plinavant hai dà bronz en il super-g ed il slalom gigant.
Inspiraziun per Losanna 2020
Ina medaglia hai er dà per il comité d’organisaziun ch’ha procurà a Lillehammer per ina grondiusa plattafurma per las giuvnas sportistas ed ils giuvens sportists. Ils proxims gieus olimpics d’enviern da la giuventetgna èn lura en quatter onns, il 2020 a Losanna.