Dapi bundant dus onns accumpogna la Televisiun Svizra a giuvens talents da sport. En la seria da documentaziun «Morgen sind wir Champions» accumpognan las cameras a talents da ballape, a dunnas che dattan ballape e dapi quest enviern er a talents da hockey. Ils talents che vegnan purtretads èn tuts part da la naziunala Svizra sut 18 onns e futuras speranzas sin il glatsch.
Dal Cdh Engiadina tar l’elita dal HCD
In dals talents che vegn era a pled en la seria è Fabian Ritzmann da Scuol. Il giuven da 18 onns ha emprais l’amulain da hockey tar il Cdh Engiadina. Cun 15 onns ha el dentant gia savì ir a Tavau a dar cun la U15 dal HCD. Silsuenter ha Ritzmann fatg il pass en la naziunala U16, U17 ed era en la U18. Tar il HCD dat l'attatgader actualmain en l’equipa da l’elita, en la U20. Dasperas ha il hockeyan gest pudì cumenzar cun il giarsunadi da commerzi tar il Club da hockey da Tavau. Sin il secretariat ha el fatg ses giarsunadi ch'el sa terminar, sche tut va bain, questa stad.
Purtret da la vita da Fabian Ritzmann
En la documentaziun «Morgen sind wir Champions» ves'ins danunder ch'il giuven talent deriva, co ch'el trenescha a Tavau, e co ch'el dat sin il glatsch per la U20 dal HCD. Ultra da quai dat il doc era ina invista en la vita privata dal talent, ed en ses mund da lavur.