Siglir tar il cuntegn

Header

cuntegn

Naziunal/Internaziunal Svizra vul e sto franar CR7

A la naziunala Svizra manca anc in sulet punct per sa qualifitgar direct per ils proxims campiunadis mundials da ballape il 2018 en Russia. Cun almain in pari en il davos gieu da qualificaziun a Lissabon encunter il Portugal fiss la Svizra per la quarta giada en seria a campiunadis mundials.

audio
Bunura: La Svizra avant il duel cun Cristiano Ronaldo «CR7»
ord Actualitad dals 10.10.2017.
laschar ir. Durada: 3 minutas 9 Secundas.

Che la Svizra po batter il campiun d’Europa, quai han ins vesì en l’emprim gieu da qualificaziun. A Basilea ha l’equipa da Vladimir Petkovic battì ils Portugais cun 2:0. Avant passa in onn n’era CR7 dentant betg da la partida, Cristiano Ronaldo. Ed il Portugal senza ni cun Ronaldo è ina differenza. Il superstar da Real Madrid è dapli che mo in giugader e vala dapi onns sco in dals megliers ballapedists dal mund.

Cristiano Ronaldo – la figura centrala dal Portugal

26 titels ha Cristiano Ronaldo gia gudagnà en sia carriera ch’el ha lantschà tar Sporting Lissabon. Quatter giadas ha CR7 gudagnà la Champions League e quatter giadas è el vegnì onurà sco meglier giugader dal mund. Ronaldo tira gols en seria, tar Real sco er per la naziunala dal Portugal. È el sin plaz è il spectacul garantì. Cristiano Ronaldo è adina bun per decider in gieu, oravant tut gieus decisivs sco questa finalissima en l’Estádio de Luz. Vul la Svizra pia er batter il Portugal en la chapitala Lissabon ston Stephan Lichtsteiner e collegas en mintga cas franar CR7.

Concurrenza: Tge resultat datti en il gieu tranter Portugal e Svizra?

Ils Svizzers han mussà ina qualificaziun suverana. Ils Portugais dentant èn favurisads. Tippai er Vus!

RR actualitad 08:00

Artitgels legids il pli savens